Գորտնուկը մաշկի բարորակ նորագոյացություն է, որն ունի վիրուսային ծագում: Գորտնուկն առաջանում է մարդու պապիլոմավիրուսից (ՄՊՎ): Վարակը փոխանցվում է ուղղակի և անուղղակի ճանապարհով` մարդուց մարդ, կենցաղային առարկաներով, սեռական ճանապարհով, մորից երեխային, ինչպես նաև կարող է տարածվել ինքնավարակման միջոցով: Նպաստող գործոն է հանդիսանում մաշկի վնասումը, ինչպես նաև գերքրտնարտադրությունը, մարդու օրգանիզմի ցածր դիմադրողականությունը, իմունադեպրեսիվ բուժումը և այլն:Գորտբուկի առաջացումը տարիքային սահմանափակում չունի։ Գորտնուկների քանակը և չափերը տարբեր են տարբեր մարդկանց մոտ:

Տարբերակում են հիմնականում 4 տեսակի գորտնուկ:

• Սովորական կամ հասարակ` կլորավուն, անհարթ, եղջերային շերտով պատված, անցավ դեղնավուն գույնի հանգույցներ են: Հաճախ լինում են բազմակի, տեղակայված են ձեռքերրի ափային մակերեսի, հարեղնգային հատվածում, ավելի քիչ` գլխի մազածածկ մակերեսին, բերանի լորձաթաղանթի վրա, շրթունքների կարմիր երիզին և այլն:
• Տափակ (պատանեկան) գորտնուկ`տափակ, հարթ մակերեսով, մաշկագույն գոյացություն է: Հիմնականում տեղակայված են լինում դեմքին, ձեռքերի և սրունքների վրա:  Սովորական և տափակ գորտնուկները հիմնականում տարածված են երեխաների, դեռահասների և երիտասարդ տարիքի անձանց մոտ:
• Ներբանային գորտնուկ` փայլուն, անհարթ,  հաստացած, եղջերային օղով շրջապատված  ցավոտ գոյացություն է, որը առաջանում է հիմնականում ներբանների հենման կետերում: Քայլելիս պատճառում են ցավ, բացասական են ազդում կյանքի որակի վրա: Վարակվում են սպորտային դահլիճներում‚ լողավազաններում։ Գորտնուկների վրայի եղջերացված շերտը հանելիս, բացվում են սև կետեր (թրոմբացված մազանոթներ)։
• Սրածայր գորտնուկ ( սրածաայր կոնդիլոմա)` տեղակայվում են սեռական օրգանների լորձաթաղանթների վրա, փոխանցվում են սեռական ճանապարհով և ունեն չարորակացման բարձր ռիսկ:

Գորտնուկի բուժումը իրականացվում է մի քանի մեթոդով` կախված տեղակայումից և տեսակից:

• Մաշկաբանի խորհրդատվություն, բուժում
• Կրիոդեստրուկցիա հեղուկ ազոտով՝ ամենախնայող, ավելի քան արդյունավետ մեթոդներից է
• Լազերոթերապիա ( NdYAG ,CO2-լազերներ)
• Էլեկտրոկոագուլյացիա

Տարածուն և մեծաքանակ գորտնուկների բուժման համար առաջարկում ենք հատուկ փաթեթներ։